kahāñ mahfil meñ mujh tak bāda-e-gulfām aatā hai
jo merā naam aatā hai to ḳhālī jaam aatā hai

na aao tum to phir kyuuñ hichkiyoñ par hichkiyāñ aa.eñ
inheñ roko ye kyuuñ paiġhām par paiġhām aatā hai

ye sāvan ye ghaTā ye bijliyāñ ye TūTtī rāteñ
bhalā aise meñ dil vāloñ ko kab ārām aatā hai

adab ai jazba-e-bebāk ye āh-o-fuġhāñ kaisī
ki aisī zindagī se maut par ilzām aatā hai

madad ai marg-e-nākāmī naqāhat kā ye aalam hai
baḌī mushkil se hoñToñ tak kisī kā naam aatā hai

ḳhudā rakkhe tujhe ai sar-zamīn-e-shahr-e-ḳhāmoshāñ
yahīñ aa kar har ik bechain ko ārām aatā hai

ma.āz-allāh mirī āñkhoñ kā izhār-e-tañg-zarfī
Tapak paḌte haiñ aañsū jab tumhārā naam aatā hai

zamāne meñ nahīñ dil-dāda-e-mehr-o-vafā koī
tujhe dhokā hai ai dil kaun kis ke kaam aatā hai

kahan mahfil mein mujh tak baada-e-gulfam aata hai
jo mera nam aata hai to KHali jam aata hai

na aao tum to phir kyun hichkiyon par hichkiyan aaen
inhen roko ye kyun paigham par paigham aata hai

ye sawan ye ghaTa ye bijliyan ye TuTti raaten
bhala aise mein dil walon ko kab aaram aata hai

adab ai jazba-e-bebak ye aah-o-fughan kaisi
ki aisi zindagi se maut par ilzam aata hai

madad ai marg-e-nakaami naqahat ka ye aalam hai
baDi mushkil se honTon tak kisi ka nam aata hai

KHuda rakkhe tujhe ai sar-zamin-e-shahr-e-KHamoshan
yahin aa kar har ek bechain ko aaram aata hai

maaz-allah meri aankhon ka izhaar-e-tang-zarfi
Tapak paDte hain aansu jab tumhaara nam aata hai

zamane mein nahin dil-dada-e-mehr-o-wafa koi
tujhe dhoka hai ai dil kaun kis ke kaam aata hai

Source: Book : Ghazaliyat-e-ahsaan Danish (Pg. 250) Author : Shabnam Parveen Publication : Asghar Publishers (2006) Edition : 2006