palkoñ pe rukā qatra-e-muztar kī tarah huuñ
bāhar se bhī bechain maiñ andar kī tarah huuñ

bāhar se mire jism kī dīvār khaḌī hai
andar se maiñ ik TuuTe hue ghar kī tarah huuñ

nazroñ se girā do ki mujhe devtā maano
patthar ke tarāshe hue paikar kī tarah huuñ

chhā.ī haiñ mire sar pe siyah-posh ghaTā.eñ
maiñ sub.h meñ bhī shaam ke manzar kī tarah huuñ

andar kī chaTānoñ se na Takrā ke bikhar jā.ūñ
maiñ biphrā huā ḳhud pe samundar kī tarah huuñ

tum jalva-numā ho to khulī haiñ mirī āñkheñ
aa lipTo badan se to maiñ chādar kī tarah huuñ

rahtā hai kahīñ jism bhaTaktī hai kahīñ ruuh
ghar meñ huuñ magar aaj maiñ be-ghar kī tarah huuñ

aqdār kī uThtī huī dīvār meñ chun lo
raste meñ paḌā maiñ kisī patthar kī tarah huuñ

palkon pe ruka qatra-e-muztar ki tarah hun
bahar se bhi bechain main andar ki tarah hun

bahar se mere jism ki diwar khaDi hai
andar se main ek TuTe hue ghar ki tarah hun

nazron se gira do ki mujhe dewta mano
patthar ke tarashe hue paikar ki tarah hun

chhai hain mere sar pe siyah-posh ghaTaen
main subh mein bhi sham ke manzar ki tarah hun

andar ki chaTanon se na Takra ke bikhar jaun
main biphra hua KHud pe samundar ki tarah hun

tum jalwa-numa ho to khuli hain meri aankhen
aa lipTo badan se to main chadar ki tarah hun

rahta hai kahin jism bhaTakti hai kahin ruh
ghar mein hun magar aaj main be-ghar ki tarah hun

aqdar ki uThti hui diwar mein chun lo
raste mein paDa main kisi patthar ki tarah hun

Source: Book : Pani Patthar (Pg. 88) Author : Yasiin Afzaal Publication : Maktaba Fikr-e-Nav (1986) Edition : 1986